In de joaren zeumtig reed d’r in de Stöppelhaene-optocht een praalwaa’ng mee, met een draak d’r op van stront. Een boeren-protest tee’ng gemeentelijke plannen vöar een recreatieplas in buurtschap Ramele. De strontdraak kreeg de publiekspries.
Denne van Knöldert
Veartig joar terugge was de Stöppelhaene dus al podium vöar boerenprotest. Die draak scheut mie te binnen toen ik een pickup truck tussen de trekkers zagge riene met een doodskiste d’r op met de name ‘Jesse’. Boerenwoardvoeders bie DWDD en Pauw zagen doar de humor wel van in. En ik ben nergens teeng ekomm det LTO doar ofstand van nemt.
Dus toen dach ik, wrum in de kommende Stöppelhaene-optocht niet ok met zo’n doodskiste rondriene. Det dut de langzaam doodbloedende optocht goed en het publiek zut er de humor wel van in, leart de ervaring. De LTO zit bie in het Stöppelhaene-bestuur en in de haarvaten van het Roalter gemeentelijk apparaat dus van die kante hoeve wie ok gin veto te verwachten.
Toen kwam ik an het noadenken oaver wulke name d’r dan op die kiste zol mun. Ik dach an een economische wetholder die het gifgebruuk op de lelievelden op ons Sallandse platteland niet verbiedt, of an een milieuwetholder die niet te hoop löpp teeng het gebruuk van glyfosaat.
Mar ik durve de vöarnamen van die wetholders nog niet iens in dit stukkie te schrie’m, loat stoan det ik d’r met in een optocht rond goa riene. As iets verre weg is, is het bliekbaar minder erg. Pieter Storms met Breekijzer was leuk, mar Willy Oosterhuis met een Overijsselse versie was minder. Oe dochter van 10 die epest wördt is een ramp, mar det haar t-shirt döar een leaftiedsgenoot in India emaakt is, ach… Een doodskiste met ‘Jesse’ noar Den Haag is ’lachen man’, mar een lokale wetholder in de Stöppelhaeneoptocht…
Het bericht Denne: met een doodskiste in de Stöppelhaene-optocht verscheen eerst op Opinie in Salland.