Ik las een persbericht van de gemeente Roalte met de boodschap det de kans op een bekeuring vöar fietsers in de winkelstroate groot is. Vöardet zo’n persbericht weg’estuurd wördt, mut d’r altied heel völle meansen een plassie oaver doene en dan is het resultaat vake een draak van een tekst. Leas mar met:
In Raalte houden we rekening met elkaar, ook in het centrum van Raalte. Dit is een wandelgebied waar de fietser buiten openingstijden van de winkels welkom is. Het winkelend publiek en winkeliers ervaren dat er binnen openingstijden toch vaak gefietst wordt in het centrum. Dit zorgt voor overlast. Daarom roepen we inwoners op om niet te fietsen in het centrum. En heb je last van fietsers, spreek elkaar dan op een goede manier aan op dit gedrag.
Det wie rekkening met mekare hoalt en det wie gin rekkening met mekare hoalt…
En det wie mekare d’r op an mut sprekken. Heb ie det wel ‘ns edoane? Iemand ansprekken op iets det nie mag?
Een roker in de Ribs en Blues-tente vroang of e asjeblieft eans aans wul goan stoane.
Een bumperklever verzuken of e iets mear afstand wul ne’mm.
Een brommer op een recreatief fietspad wiezen op zien oavertreding.
Een gemeente attenderen op malle persberichten.
Ik probear die dinge – ok precies die dinge – altied op allerlei manieren te vroang, op zuuk noar ‘een goede manier’. Alles wat mie ten deel valt is:
Een glas bier in mien gezichte van die roker.
Een bumberklever die mie inhaalt en klem ridt.
Een brommert die zeg det ik nie zo’n grote bek mut he’mm en det zien va zich vrogger ok lekker nooit an de regels heuld.
Een gemeente die mie völ te kritisch vindt.
Dus ben ik blie det fietsers ok gewoon bekeurd wördt. Zal ze learen!
Die boetes wördt uut’edeeld döar ‘buitengewoon opsporingsambtenaren (boa’s) en student-boa’s’. Döar wat?
Wie kan ik op een goede manier ansprekken op det woardgebruuk?
Denne van Knöldert
Het bericht Denne probeart op ‘een goede manier’ an te sprekken verscheen eerst op Opinie in Salland.